वीरमा विपन्न बिरामीका कुरुवालाई सित्तैमा खाना

अन्य अन्य

Posted by boudhasancharadmin on 2025-02-06 06:03:18 |

Share: | | | Visits: 115

---

बिरामीका कुरुवाले भोग्नुपरेको भोक मार्नका लागि खेप्नुपरेको दुःख, कष्टमा मलम लगाउनका लागि वीर अस्पतालमा निःशुल्क खाना खुवाउन थालिएको छ । समानुभूति नेपाल, सारा चिल्ड्रेन होम नेपाल तथा नवदुर्गा पार्टी भेन्युको सहकार्यमा बिरामी कुरुवालाई खाना खुवाउन थालिएको हो।

अस्पतालमा उपचारका लागि आएका बिरामीको कुरुवालाई बुधबारदेखि संस्थाले बिहान–बेलुका खाना खुवाउन थालेको वीर अस्पतालका उपकुलपति डा.भुपेन्द्र बस्नेतले जानकारी दिए ।

‘बिरामीलाई हामीले नियमित रुपमा खाजा र खानाको व्यवस्था गरेका छौँ । तर कुरुवाका लागि भने व्यवस्था गर्न सकेका थिएनौं,’ डा. बस्नेतले अनलाइनखबरसँग भने, ‘पैसा नभएका कारणले बिरामीलाई दिएको खानेकुरा कुरुवाले बाँडेर समेत खाएका हुन्छन्।’

सामाजिक कार्यमा संलग्न संस्थाको मनकारी भावनाले बिरामीको कुरुवालाई धेरै राहत मिल्ने डा.बस्नेतले बताए।

उनका अनुसार सबै बिरामीको कुरुवालाई भन्दा पनि लामो समय अस्पताल बसेका र खानेकुरा समेत जुटाउन नसक्ने बिरामीका कुरुवालाई खाना दिइनेछ । स्वास्थ्यकर्मीले बिरामीको कुरुवा रेफर गरेको आधारमा मात्रै संस्थाले कार्ड बनाएर खानेकुरा दिन्छन्।